Құттықтау

Құрметті, әлеуметтік сала қызметкерлері!
Сіздерді кәсіби мерекелеріңізбен шын жүректен құттықтаймын!
Жұртшылықпен етене байланыста атқарып жатқан еңбектеріңізге табыс пен жетістіктер тілеймін!
Игі тілекпен, аудан әкімі Е.С.Садырқұлов

Құрметті, «JAMBYL» ТЕЛЕАРНАСЫНЫҢ ҰЖЫМЫ!
Сіздерді «JAMBYL» телеарнасының 30 жылдық мерейтойымен шын жүректен құттықтаймын!
Баспасөз қоғам айнасы десек, оның ішінде телеарнаның алар орны аса маңызды. Жұртшылықты аймақтың бас арнасы ретінде күнделікті жаңалықтармен, өңірдің тыныс-тіршілігімен таныстырудағы еңбектеріңіз зор! Аймақтық басты арнасы өзінің қоғамдағы орны мен құндылығын жоғалтпай, халықтың ыстық ықыласына бөленген. Облысымызда болып жатқан саяси, мәдени, әлеуметтік, экономикалық, басқа да түрлі оқиғаларды халыққа дер кезінде сапалы жеткізіп отыратын Сіздердің ерен еңбектеріңізге алғысымыз шексіз.
Қымбатты,«JAMBYL» телеарнасының ұжымы!
Ұжымның әр қызметкерін 30 жылдық мерейтойларыңызбен тағы да құттықтай отырып, қоғаммен біте қайнасып, билік пен халық арасындағы алтын көпірге айналған еңбектеріңізге толағай табыс, өздеріңізге зор денсаулық пен амандық, отбасылық бақыт тілеймін.
Еңбектеріңіз жемісті, әр күндеріңіз жеңісті болсын!

Құрметпен,
Е.С.Садырқұлов-Т.Рысқұлов ауданы әкімі

Құрметті,жерлестер, аудан тұрғындары мен қонақтары!

Баршаңызды Қазақстан Республикасының Тұңғыш Президенті күнімен құттықтаймыз! Тәуелсіз мемлекет басшысы Нұрсұлтан Назарбаев–барлық қазақстандықтар және халықаралық қоғамдастық мойындаған тың идеялар мен жаңа істердің бастаушысы. Көшбасшы Нұрсұлтан Әбішұлы бірлік пен елдікті, татулық пен достықты ту етіп, тәуелсіздікті баянды, егемендікті әлемге танытқан-дара тұлға. Елбасының толассыз еңбегі мен сарабдал саясатының арқасында ғасырда жасалар ғаламаттар тәуелсіздік жылдары жүзеге асты. Қазақстан Республикасының Тұңғыш Президенті Күні мерекесін атап өте отырып, Елбасымызға, мемлекетіміздің қалыптасуы мен дамуына қосқан тарихи еңбегіне құрмет көрсетеміз. Халық алдында, мемлекет алдында осындай толағай тірлік атқарған Президент күнін атап өту – үлкен қуаныш, зор мәртебе. Мереке құтты болсын, ағайын! Құрметті, жерлестер! Қысқа мерзім ішінде Қазақстан қанатын кең жайған саяси, экономикалық және әлеуметтік реформаларды жүзеге асырған, өзінің даму жолын тапқан жаңа заманғы бәсекеге қабілетті ел болып танылғанын мақтан етеміз! Тұрақтылық және қоғамдық келісім, сыртқы саяси жауапты бағыт – елдің халықаралық беделінің өсуі үшін берік негіз болды. Н.Ә.Назарбаевты әлем әділетті түрде ұлт Көшбасшысы – Елбасы деп атайды. «Елі еріне, ері еліне» сенген еліміз бен Елбасымыздың мәртебесі әлем елдері алдында мәңгілік биіктей берсін! Мемлекет тарихының мерейлі мерекесі – Тұңғыш Президент күні құтты болсын! Осы айрықша мәнді күні елдің игілігі үшін қызмет жасап жүрген баршаңызға мерекелік көңіл – күй, жанұялық бақыт, игілік пен табыс, зор денсаулық, береке-бірлік тілеймін!

Құрметті, жерлестер, ардақты ағайын!

Сіздерді ұлтымыздың ұлық мерекесі-Тәуелсіздік күнімен құттықтаймын!

Ұлттық қасиетіміз бен құндылықтарымызды ұлықтап, Ұлттық намысымызды оятқан, әлемге қазақты азаттық сүйгіш, рухы биік, намысы берік халық ретінде жариялаған Тәуелсіздік күні құтты болсын, ағайын!

Қазақстан бүгінде, қыдыр дарып, бақ қонған, ырыс жайлаған елге айналды! Аз ғана уақыт ішінде егемен еліміз әлеуметтік-экономикалық дамудың жарқын жолынан өтіп, халықтың тұрмыс деңгейі артты, тұрақтылық пен өркендеудің жолы айқындалды. Ең бастысы, көп ұлтты халқымыздың татулығы мен ынтымағының арқасында тұрақты қоғамдық-саяси ахуал қалыптасты.

Халқымыздың ғасырлар бойы аңсаған Тәуелсіздігіне ие болғанымызға биыл 28 жыл толды. Бұл күн – ата-бабамыз аңсаған арманның жүзеге асқан, елімізге еркіндік сыйлаған Ұлы күн.

Әр ұлт, әр халық үшін тәуелсіздіктен артық қасиетті де қымбат ештеңе жоқ. Еліміз алып, құқықтық, дербес демократиялық мемлекет ретінде әлемге танылды. Тұңғыш Елбасы Нұрсұлтан Назарбаев «Қазақстан-2050» стратегиясында «Біздің бір ғана Отанымыз бар, ол – Тәуелсіз Қазақстан!» деп ерекше тоқталған. Олай болса, ынтымағы мен достығы жарасқан Тәуелсіз Қазақ елінің бағын асырып, мерейін тасытатын ұлы істеріңізге сәттілік тілеймін! Рухы биік, намысы берік бабаларымыздың ғасырлар бойғы асыл мұраты – азаттықты аялау, тағдыры ортақ тұтас халқымыздың татулығын сақтау – басты мұратымыз. Сіздерді Қазақстан Республикасының Тәуелсіздігі күні – Ұлттық мерекесімен шын жүректен құттықтай отырып, дендеріңізге саулық, отбастарыңызға амандық, шаңырақтарыңызға шаттық тілеймін! Тәуелсіздігіміз тұғырлы, бірлігіміз баянды, еліміз еңселі болсын, ардақты ағайын!

Барша бастамалар мен игі істер жемісті болып, туған Жеріміз, Еліміз – Қазақстан гүлденіп, көркейе берсін! Әр отбасына татулық пен ырыс-береке, Отанымыздың игілігі мен жарқын болашағы жолында жетістіктер тілеймін. Еліміздің Көкбайрағы бейбіт аспан астында желбіреп, әлемге таныла берсін! Ата-бабамыз ғасырлар бойы армандап өткен тәуелсіз ел болу мәртебесін көру – бүгінгі ұрпаққа бұйырған зор бақыт. Осы қуанышымыз құтты, бақытымыз баянды болсын. Жаңа ғасырда қайта түлеген, жасарып, түрленген еліміздің тәуелсіздігі берік, абыройы асқақ болсын!

Игі тілекпен, аудан әкімі Е.Садырқұлов

Құрметті, аудан тұрғындары!
Сіздерді төрімізге енген Жаңа жылмен шын жүректен құттықтаймын! Жаңа жылда жағымды жаңалықтар мен толағай табыстар, мол жетістіктер жалғасын тапсын! Әрбір игі істер мен жаңа бастамаларыңызға сәттілік серік болып, еңбектеріңіз жана берсін! Абырой мен бақ-береке, қуаныш пен жақсылық келе берсін!
Әр отбасына баянды бақыт пен бақ-дәулет, береке мен бірлік, зор денсаулық тілеймін! Жаңа жылдың сүйіншісі мен жағымды жаңалығы көп болсын! Жаңа жыл мерекелі, берекелі жыл болып, мерейлеріңіз үстем, беделдеріңіз биік болып, абыройларыңыз арта берсін!!
Игі тілекпен, аудан әкімі Е.Садырқұлов

Құрметті Ауған соғысының ардагерлері!
Қандай да болмасын ұлттың, мемлекеттің ұзына бойы тарихында орын алған айрықша оқиғалар ешқашан ұмыт қалмайды.
Күні кешеге дейін көпшілік қауым үшін белгісіз болып келген Ауған соғысының жылнамасы отандық жаңа тарихымыздың ең қаралы парақтарының бірі болып қала береді.
Міне, биыл Кеңес әскерлерінің Ауған жерінен оралғанына – 31 жыл толып отыр.
Мыңдаған жас азамат жат елде жан тапсырып, мыңдаған қандастарымыз ұрыс даласынан жарақатпен оралды. Оқ пен оттың ортасынан аман-есен оралғандар үшін Ауғаныстан мәңгілік жан жарасына айналды.
Соғыс салған жан жарасы әлі жазыла қойған жоқ. Майдан шебіне Кеңес одағынан 620 мың адам азаматтық борышын өтеуге аттанса, олардың 22 мыңы қазақстандық жауынгерлер болатын.
Біздің ауданымыздан да соғысқа 120 жауынгер қатысты.
Сол кезде небәрі 18-19 жастағы жігіттер, халқымыздың батырлығын, ержүректігін бойына сіңіріп өскен қазақ жауынгерлері, жан алысып, жан беріскен, кескілескен ұрыстарға қатысып, майдан даласында ерлік көрсетті.
Олар Отан алдындағы антын абыроймен адал атқарды. Ауған соғысының ардагерлері ұрыста қаза тапқан қаруластарын мәңгі естерінде сақтайды.
Бейбіт өмірімізді қорғайтын жастарымыздың бойына отансүйгіштік сезім мен патриоттық рух ұялатар майдангер азаматтар – қай уақытта да үлгі – өнеге, тәрбие мектебі.
Олардың ерліктерін насихаттау арқылы мемлекетшілдік, отансүйгіштік, қасиеттерді жастардың бойына сіңіреміз.
Бұл күн Ауған соғысы ардагерлеріне қайғы болып қатталып, қасірет болып жатталып қалса да тәуелсіз Қазақстанның әрбір күні бейбіт өмірдің бесігінде тербетіліп, әрбір үйдің түтінінің түзу шыққанын тілейтін біздер үшін, санамызда қанмен және термен жазылған күн болып қала бермек.
Ауған соғысының ардагерлеріне денсаулық, ұзақ өмір, отбастарыңызға амандық, бақ-береке, тілеймін.
Еліміз аман, жұртымыз тыныш болсын.